Vieiros

O equipo catalán Pons Racing estará de novo na grella de saída da World Series by Renault, a división de prata do automobilismo de alta velocidade. Aos mandos dos seus bólidos estarán o inglés James Rossiter e o pontevedrés Celso Míguez, que vestirá o buzo do Pons por segunda tempada consecutiva na categoría.

O experimentado piloto oxoniense James Rossiter obtivo varias vitorias en Fórmula Renault, na British F3 e, o pasado ano, nas F3 Euro Series. Na tempada 2006 este piloto inglés de vinte e dous anos centrarase nas actividades de Pons Racing nas World Series e mentres continuará co seu papel no equipo Honda Racing de Fórmula 1. O equipo Pons Racing, dirixido polo dobre campión mundial de motociclismo Sito Pons, botará a terceira tempada nas World Series, logo de seren campións en 2004 con Heikki Kovalainen, agora piloto oficial de probas de Renault Formula 1, e subcampións en 2005 con Adrián Vallés. O director técnico do equipo, Jesús Sánchez, continuará nas súas funcións na nova tempada.

Este ano, as World Series by Renault terán 17 carreiras repartidas en oito países e nove circuítos diferentes, e co atractivo engadido de competir no lendario circuíto de Mónaco. A tempada iniciarase o 30 de abril no circuíto belga de Zolder.