Vieiros

Ainda, achamos que tal satisfacçom deve ser matizada em duas direcçons: em primeiro lugar, a atençom minuciosa aos quadros ideológicos e à distinta fortuna das siglas galeguistas nom inibe de ocuparmo-nos dos condicionamentos estruturais e conjunturais que movem os protagonistas do processo a se fazerem nacionalistas e a decantarem-se, no interior deste movimento social, por umhas ou outras das correntes que operam no conflitivo e fragmentado campo político da altura. Em segundo, porque qualquer estudo sobre nacionalismo com vocaçom explicativa deve concluir, com toda a prudência que se quiger, avaliando o nível de sucesso alcançado pola proposta nacionalizadora, o que ultrapassa com muito a mediçom dos seus soportes eleitorais ou do número de afiliados dos seus partidos. Prescindiremos de atingir a primeira das questons abertas assinaladas, nom estritamente relacionada com o tema deste artigo, e aproveitaremos esta homenagem ao alcalde assassinado para debruçarmos na segunda. Partimos para a nossa análise de umha compreensom ampla do fenómeno nacionalista: entendendo-o nom apenas como proposta política, nem tam sequer só como movimento social, mas como cultura, concepçom global do mundo nutrida e desenvolvida através de umha trama mui densa redes organizativas e referentes simbólicos que tomam corpo nas mais variadas expressons da esfera pública, da imprensa aos partidos, passando polas instituiçons culturais ou o lezer organizado....

» máis en Murguía. Revista Galega de Historia