Vieiros

O Escenario Estrella do Festival de Ortigueira cobrará vida, un ano máis, a partir das 22:00 horas desta noite. Estará sobre el, para abrir a XXII edición do certame, a agrupación cultural Gamelas e Anduriñas, de Espasante. Seguiranlle nesta xornada inaugural dedicada á danza o Grupo folclórico Lous Thancayres das Landas, a Dominic Graham School of Irish dance, e Nova Galega de Danza, co seu espectáculo Engado, Ilusionistas de a pé.

Con todo, os que decidan achegarse pola vila con tempo poderán visitar dende a tardiña a exposición Lugar de orixe, de Gabriel Tizón. Situada na praza de Isabel II recolle algúns dos mellores momentos do Festival 2005 vistos a través do lente do recoñecido fotoxornalista. Xa ás 21:00 horas, terá lugar a inauguración oficial do muíño de vento do Campo da Torre, recentemente rehabilitado.

Amplo programa de actividades

A oferta será variada nos vindeiros días. O venres cómpre salientar o concerto Galicia & outras músicas, dirixido por Javier Limón. A proposta, conmemorativa do centenario de Estrella Galicia, afástase en parte da tradición puramente celta do Festival para apostar pola "folk-fusión". Así, estarán sobre o mesmo escenario a Escola de Gaitas de Ortigueira, Dominic Graham School of Irish dance Budiño, Leilía e Uxía, xunto a Jerry González, La Negra ou Concha Buika, entre outros.

Nas xornadas do sábado e o domingo Ortigueira moverase ao ritmo de Llan de Cubel, os estadounidenses Solas, a Original Kokani Orkestar, Xochilmica, Session A9, Berrogüetto, Four men and a dog ou os míticos Gwendal. Iso falando soamente do escenario principal xa que dende o Runas, outros oito grupos noveis -catro deles galegos- darán a coñecer as súas propostas.

Un amplo abano de actividades paralelas, mostras, obradoiros de danza e instrumentos, conferencias... completan a axenda de actividades previstas. Se queres ser o/a mellor informado/a, podes tomar nota de todas elas na web oficial do Festival.