Vieiros

Celso Míguez debutará este sábado en Donington coa escudería Comtec Rácing nas World Series by Renault. O piloto galego cambia así de equipo para as tres últimas carreiras da temporada: Donington, Le Mans e Cataluña.

"Comtec é un equipo inglés liderado por Jonathan Lewis. Dispón dunha contrastada experiencia en certames internacionais como a Fórmula Renault 2.0 ou a Fórmula 3. É o seu primeiro ano nas World Series onde está a obter bos resultados. Son moi metódicos no seu traballo, como é norma nas infraestruturas británicas". Así define o pontevedrés o equipo co que debutará na sétima proba do ano que se desenvolverá o sábado día 9.

Míguez amósase optimista de cara a conseguir unha boa clasificación no circuíto inglés. "É unha pista moi rápida, con moitas curvas de terceira e cuarta velocidade onde a incerteza climatolóxica é constante. Ten moitos desniveis e un segundo sector rapidísimo onde se poden marcar diferenzas nos tempos por volta. Dispón tamén de curvas cegas que complican as freadas. É determinante dispor dun monoplaza que free ben, pero rápido en resposta de aceleración e cambios de dirección", comenta o galego.