Vieiros

A consellaría de Presidencia agarda que na próxima primavera, e logo da aprobación no Consello da Xunta e o posterior debate parlamentario, poida entrar en funcionamento a Lei de Emerxencias, creada para "artellar todo un servizo integrado por profesionais e voluntarios que traballan para facer fronte a situacións de emerxencias, establecendo un mando unificado para as situacións de crise".

A Axencia xestionará o centro de atención 112 Galicia, baixo a supervisión da Presidencia da Xunta, a consellaría de Presidencia ou os departamentos nos que no seu caso deleguen os planos especiais e territoriais que se elaboren. Entre os labores a realizar está o Plan Territorial de Protección Civil, plans especiais e protocolos operativos varios; a avaliación de riscos e a convocatoria e a coordinación da colaboración necesaria. Isto inclúe a doutras administracións e tamén a dos cidadáns, aos que en situacións de emerxencia lles pode ordenar "a prestación de servizos persoais" de forma proporcionada, así como a requisa ou intervención temporal de bens, incluídos combustíbeis, nos casos nos que sexa necesario.

O proxecto inclúe a creación dunha "entidade pública de servizos para situacións de emerxencia", para a actuación nas posíbeis crises recollidas nos planos de emerxencia, tanto de carácter extraordinario como imprevisto. Será un grupo "con carácter de medio instrumental propio
da administración autonómica" que realizará intervencións de xeito inmediato e con posterioridade para a rehabilitación dos servizos básicos afectados pola emerxencia.