Edición xeral
En cinco anos, o 95% da enerxía consumida en Galiza virá de fontes renovábeis
O conselleiro de Innovación e Industria, Fernando Blanco, presentou este martes no Parlamento o Plan Enerxético Galego 2007-2012. O documento recolle actuacións en materia de xeración, transporte e distribución da enerxía. Segundo o conselleiro nacionalista, para o final do período de vixencia do plan, no 2012, o 95% da enerxía consumida procederá de fontes renovábeis. Calcúlase que nese tempo poderíase aforrar o equivalente a máis de dous millóns de toneladas de petróleo.
Segundo Fernando Blanco, o novo plan procurará a "consolidación dunha base enerxética sólida no país, que sexa vector clave do escenario de crecemento industrial e económico e faga aumentar os niveis de vida e benestar dos galegos e galegas". O conselleiro nacionalista tamén sinalou que o documento sentará as bases dunha industria que "será o motor do desenvolvemento económico do país".
Neste sentido, as principais liñas de actuación da consellaría tamén recollen a intención de reducir a dependencia enerxética diversificando as fontes de enerxía e potenciando as renovábeis; impulsar o aforro e eficiencia enerxética e reducir o consumo; fomentar a I+D+I no eido enerxético e lograr que boa parte dos beneficios da xeración eléctrica queden no país en proveito dos cidadán e mediante a participación pública en empresas enerxéticas.
No período de vixencia do plan investiranse un total de 6.556 millóns de euros, dos cales 4.410 millóns destinaranse ao desenvolvemento de enerxías renovábeis, 1.018 á xeración eléctrica convencional e 619 ás infraestruturas eléctricas.
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto