Vieiros

Vieiros de meu Perfil


Edición xeral

RSS de Edición xeral
INDUSTRIA REMATA A EXECUCIÓN DE PLANS ENERXÉTICOS EMPRESARIAIS

Admitidos a trámite máis de 500 megavatios de novos proxectos eólicos

A Consellería de Innovación e Industria admitiu a trámite vinte e catro solicitudes de instalación de novos parques eólicos por un total de 511,77 megavatios de potencia eléctrica. A listaxe completa aparece publicada no Diario Oficial de Galicia do martes 6. Á orde, aprobada no mes de maio, presentáronse peticións por máis de 1.900 megavatios, aínda que só estaba previsto conceder un máximo de 750.

- 18:19 06/02/2007
Tags:

Con este trámite, Industria conclúe a execución dos plans eólicos empresariais pendentes para poder dar paso a un novo modelo de desenvolvemento da enerxía eólica no país. A partir de agora, promoveranse o aumento da participación pública na potencia eólica, a preservación do medio natural e o emprego da enerxía como factor de dinamización económica.

Á convocatoria podían optar os titulares dun parque a data do 1 de xaneiro de 2005 e que non tiveran desenvolvida a potencia total prevista polo seu plan eólico. Os proxectos admitidos propoñen o desenvolvemento de zonas xa afectadas, e dez deles contemplan a participación pública, o que lle permitirá ao INEGA ter presenza en proxectos de aproximadamente 33 megavatios de potencia.

Desestimáronse aqueles proxectos que podían afectar espazos naturais protexidos ou bens de interese cultural. En cambio, déuselles preferencia ás solicitudes de repotenciamento, tres en total, que permitirán aumentar a produción eólica mantendo ou reducindo o número de aeroxeradores. Segundo datos de Industria, hoxe Galiza conta cunha potencia eólica en funcionamento ou autorizada de 4.078 megavatios e o obxectivo é acadar os 6.500 no ano 2012.


0/5 (0 votos)