Vieiros

Vieiros de meu Perfil


Edición xeral

RSS de Edición xeral
DENUNCIAN O PLÁCET DA XUNTA AOS PROXECTOS

Adega critica que as piscifatorías de Quilmas e Baroña se aproben á marxe do plan sectorial

A asociación ecoloxista Adega manifestou o seu rexeitamento á declaración de "incidencia supramunicipal" para os proxectos de piscifactorías de Stolt Sea Farm, por parte do Consello da Xunta deste xoves, en Porto do Son e Carnota. Segundo Adega, esta declaración faise á marxe do novo Plan Sectorial de Parques de Tecnoloxía Alimentaria, actualmente sometido a Avaliación Ambiental Estratéxica. Argumentan que, precisamente, é esta planificación sectorial a que debe fixar as condicións precisas para a ampliación ou instalación de novas plantas acuícolas.

- 07:11 16/02/2007
Tags:

O colectivo ecoloxista Adega denunciou este xoves a aprobación do proxecto que, "malia non comportar a autorización inmediata destas piscifactorías, pois aínda quedan os informes de viabilidade preceptivos, distorsiona todo o procedemento de revisión do Plan Sectorial e podería supoñer un trato de favor cara Stolt Sea Farm fronte ás demais empresas do sector e aos colectivos locais".

Nas alegacións expostas por Adega a este plan, facían referencia ás "cautelas precisas para salvagardar os valiosos elementos patrimoniais" destas zonas, propoñendo causas de exclusión e distancias mínimas para o amortecemento dos impactos.

"Parece evidente que nos casos de Quilmas (Carnota) e Baroña (Porto do Son) vanse producir máis que probábeis afeccións aos Lugares de Importancia Comunitaria próximos (Carnota-Monte Pindo e Costa da Morte, en Quilmas) e ao emblemático Castro de Baroña", sinalou.

Rexeitamento popular
Por outra banda, Adega salientou que os proxectos de Stolt Sea Farm para Quilmas e Baroña, "dos que a día de hoxe descoñecemos os seus detalles", teñen suscitado un forte rexeitamento por parte da poboación local, "dada a actitude de prepotencia e chantaxe dos seus responsábeis".

Afirman, ademais, que "ten pouco sentido modificar o Plan Sectorial de Acuicultura do PP, se logo se acaban aplicando as mesmas políticas insustentábeis e arbitrarias".


Ligazóns

3.67/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: