Vieiros

Vieiros de meu Perfil


Edición xeral

RSS de Edición xeral
Convocatoria do Partido Popular

Milleiros de persoas maniféstanse en Madrid polo caso De Juana

Ás cinco da tarde deste sábado comezou a primeira manifestación convocada oficialmente polo Partido Popular. Rajoy e Aznar encabezaron a marcha en contra do proceso de paz.

Redacción - 18:45 10/03/2007
Aznar, María San Gil (PP vasco) e Rajoy nun momento da marcha / Foto: París

Aznar, María San Gil (PP vasco) e Rajoy nun momento da marcha / Foto: París

Milleiros de manifestantes escoitaron o chamamento dos populares e achegáronse este sábado até o centro de Madrid para amosar a súa desconformidade coa política antiterrorista do Goberno estatal.

Dirixentes do Partido Popular, con Mariano Rajoy á fronte e coa compaña de José María Aznar, portaron na cabeceira a pancarta co lema principal da marcha, ‘España pola liberdade. Non máis cesións a Eta’.

Segundo o secretario xeral dos populares, Ángel Acebes, a marcha "marca un fito histórico" xa que considera que un estado “que se somete ao chantaxe dos terroristas non ten futuro”. Pola súa parte, Esperanza Aguirre, presidenta da Comunidade de Madrid, subliñou a lexitimidade da convocatoria e lembra que as excarceracións do anterior goberno do PP a presos de ETA “eran imperativos penitenciarios”.

Quintana di que o PP pon “en bandexa a ETA a división dos demócratas”

Apenas dúas horas antes de que comezase a marcha en Madrid, o voceiro nacional do Bloque Nacionalista Galego, Anxo Quintana, acusou á dirección do Partido Popular de “ser irresponsábel” e de “servir en bandexa a ETA a división dos demócratas”.

Quintana sinalou que a súa formación “respecta profundamente” o dereito a manifestarse dos cidadáns e pídelle o PP unha “dose de moderación” no referido á loita antiterrorista, porque “estamos ante unha cuestión de Estado na que debe haber entendemento”.


4,17/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: