Vieiros

O líder cubano, Fidel Castro, tras a complexa operación intestinal que o mantén en repouso dende hai máis de sete meses, podería retomar as súas funcións de goberno o 28 de abril, segundo anunciou o presidente de Bolivia, Evo Morales.

Nese día, cúmprese un ano da sinatura do Tratado de Comercio dos Pobos (TCP), polos gobernos boliviano, cubano e venezolano en La Habana. Ademais, é o terceiro aniversario da fundación da Alternativa Bolivariana para as Américas (ALBA), impulsada polo presidente de Venezuela, Hugo Chávez en oposición á Area de Libre Comercio das Américas (ALCA), apoiada polos EUA.

"Espero non me equivocar"
"Se decidiu o comandante e presidente Fidel realizar este acto do terceiro ano da ALBA en Cuba, desexo e coido, espero non me equivocar, que seguramente o compañeiro Fidel o día 28 ou 29 de abril vai retornar á presidencia en Cuba para seguir apoiando en temas de saúde e educación a todo o mundo", afirmou Morales durante unha concentración con labregos produtores de papa o pasado sábado.

En outubro pasado, o presidente de Bolivia xa anunciara que "Fidel está a camiñar, de acá a dúas, ou tres semanas vaise facer cargo de novo da condución do seu país", mais errara no seu vaticinio.