Vieiros

As cifras exactas da represión en Galiza logo do golpe do 1936 sempre enfrontaron aos historiadores. Agora, un estudo no que participa a Consellería de Cultura e docentes das tres universidades do país conclúe que o arquivo militar de Ferrol recolle 2.595 causas abertas a 7.227 persoas. Aínda así, os mesmos investigadores conclúen que o número real de persoas que se tiveron que enfrontar a tribunais é practicamente o dobre.

Diante da Cámara, Bugallo explicou o traballo do seu departamento a prol do Ano da Memoria 2006 e os avances no proxecto “As vítimas, os nomes, as voces e os lugares”. A conselleira explicou que os fin último deste estudo é “responder desde o rigor científico ás crecentes demandas dunha sociedade sensibilizada coa necesidade de coñecer o que aconteceu coa represión e cubrir os baleiros existentes”.


Un traballo que se poderá consultar en rede
Aínda así, o traballo vai moito máis aló xxa que tamén se están a investigar os rexistros civís e as fontes orais que proporcionan datos sobre as numerosas execucións clandestinas. De feito, Bugallo explicou que os historiadosres xa teñen compiladas 310 testemuños orais, a isto hai que sumar outros 400 do fondo propio da Universidade de Santiago.

O máis salientábel é que os traballos van estar dispoñíbeis en rede. Os internautas van poder consultar os cortes de voz, coleccións de imaxes e documentos inéditos que abriran novas perspectivas daquel tempo.