Vieiros

Vieiros de meu Perfil


Edición xeral

RSS de Edición xeral
O 'si' acada o 78,1% dos votos, por un 11'5% do 'non'

Ecuador aproba o plan de Correa para reformar a Constitución

Os resultados definitivos coñeceranse contra a fin de semana. A nova Carta Magna camiñará cara unha maior descentralización do Estado.

Redacción - 10:06 16/04/2007
Rafael Correa celebra o seu triunfo nas presidenciais do pasado novembro / Igadi

Rafael Correa celebra o seu triunfo nas presidenciais do pasado novembro / Igadi

Malia que os resultados definitivos non se coñecerán até o final desta semana, a sondaxe realizada á saída dos colexios electorais, dálle ao 'si' unha ampla vitoria. A enquisa reflicte que o 78,1% dos votantes aproba a elección da Asemblea Constitucional, mentres que o 11,5% a rexeita; o 10,4% votou en branco.

O pobo outorga deste xeito plenos poderes a Asemblea Constituínte que será formada para redactar unha nova Constitución.

O presidente ecuatoriano, Rafael Correa, afirmou este domingo que a vitoria do 'si' na consulta popular demostra que o pobo enterrou o pasado e mira cara o futuro coa Asemblea Constituínte. "Hoxe (polo domingo) triunfou o infinito amor pola patria, que é xa de todos e todas; non permitamos que nunca máis nola volvan arrincar", sinalou o mandatario en conferencia de prensa.

"Dereito a decidir nas urnas"

Tras agradecer ao pobo por apoiar a Constituínte, dixo que "esta é a vitoria máis grande que o país lembre; a vitoria do 'si' polo futuro". O titular do goberno defendeu o dereito da poboación a decidir o destino de Ecuador e chamou aos representantes políticos a resolver os conflitos no marco institucional, sobre todo, nas urnas.

Correa destacou que a Asemblea Constituínte centrará o seu labor "en lograr un novo reordenamento territorial para descentralizar o Estado e ir a adecuados sistemas de autonomías", e na parte económica "superar o nefasto modelo neoliberal imposto", salientou.

Chantaxe do Banco Mundial

Ademais, advertiu que expulsará do país ao representante do Banco Mundial se o goberno recibe presións desta organización. Ecuador investiga un presunto caso de chantaxe deste organismo para a entrega dun crédito que xa fora aprobado.

O Banco Mundial podería ter retido 100 millóns de dólares (uns 80 millóns de euros) xa outorgados, en represalia pola reforma da lei do Feirep -un fondo petroleiro- aprobada cando Correa era ministro de Economía, a mediados de 2005.
O presidente ecuatoriano defendeu o plan do Executivo para pagar "os derradeiros 40 millóns (30, en euros) que lle debemos ao Fondo Monetario Internacional".


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: