Vieiros

Vieiros de meu Perfil


Edición xeral

RSS de Edición xeral
O xornalista norteamericano é un firme opositor á guerra de Iraq

Jon Lee Anderson, premio Xosé Couso de Liberdade de Prensa

Os membros co CPXG e os asociados do Club de Prensa de Ferrol escolleron o gañador entre oito finalistas.

Redacción - 11:12 16/04/2007

O xornalista estadounidense Jon Lee Anderson recibirá o 2 de maio o terceiro premo José Couso de Liberdade de Prensa, que conceden o Colexio Profesional de Xornalistas de Galicia (CPXG), o Club de Prensa de Ferrol e Caixanova. Os colexiados do CPXG e os asociados do club ferrolán escolleron a Anderson entre os finalistas do premio pola súa oposición, dende o primeiro momento, á invasión de Iraq.

Anderson, que forma parte do cadro de persoal de The New Yorker, comezou a súa carreira especializándose en temas relacionados con Hispanoamérica e actualmente escribe sobre os conflitos posteriores aos atentados do 11 de setembro de 2001.

O fallo do premio fíxose público o venres na Galería Sargadelos de Ferrol, onde interviñeron o presidente do Club de Prensa, Xan Morales Somoza; o secretario do premio, Darío Janeiro, e o decano do CPXG, Xosé Manuel Vega. O premio Xosé Couso instituíuse no ano 2005 para lembrar a figura do cámara galego, asasinado no Hotel Palestina de Bagdad por tropas estadounidenses durante a guerra de Iraq.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: