Vieiros

Finalmente, Vladimir Putin parece renunciar ao cambio constitucional que se avaliaba nos últimos tempos e que entre outras cousas modificaría o límite de tres mandatos para o xefe de estado ruso. "O próximo discurso sobre o estado da nación vaino ler un novo presidente", indicou durante a súa intervención no Parlamento ruso.

Na súa intervención destacou a evolución de Rusia "até situarse entre as dez economías máis grandes do mundo" e avanzou a presentación dun ambicioso programa de desenvolvemento e modernización de infraestruturas e parque industrial. Ademais, anunciou que o executivo ten a intención de crear un organismo específico para o desenvolvemento de novos proxectos de enerxía atómica, que inclúen a construción de dúas ducias de novas centrais nucleares na próxima década.

Por outra parte, foi moi crítico cos países integrantes da OTAN e ao respecto do despregue do escudo de mísiles promovido polo goberno estadounidense explicou que Rusia cavila "a suspensión dos seus compromisos" en materia militar, anulando mesmo o Tratado de Armas Convencionais e relanzando a carreira armamentística.