Vieiros

"Hai tres anos viñeron os técnicos e visitaron a zona, decidimos dar os nosos terreos e que nolos pagasen entre os 9 e 10 euros por metro cadrado, pasou o tempo e aquí non volveu ninguén", comentou para Europa Press un dos veciños do lugar, Manuel Castiñeiras. El foi un dos veciños aos que lle expropiaron uns terreos con motivo da supresión dos pasos a nivel. "Se o fixesen entón agora non estariamos aquí pedindo que quiten estes pasos", insiste.

O colectivo veciñal da zona continuará coas mobilizacións, que cando menos se realizarán todos os días 25 de cada mes, en lembranza do último accidente. As mobilizacións poderían incluír, ao xeito de días pasados, os cortes da vía para evitar o paso dos trens. "Polo menos ata que se asine o convenio de supresión", advirten.

Na xuntanza celebrada este xoves no Concello entre o alcalde, o delegado do goberno español e técnicos de Adif concretouse que a sinatura do convenio está pendente da viabilidade da construción dun paso a nivel superior en Campaña, onde se produciu o accidente. Os veciños insisten en pedir máis vixilancia e avisan de que as barreiras seguen fallando.