Vieiros

A treboada política que se ergueu pola xestión de cheques asistenciais entre emigrantes en Montevideo xa levou por diante outro cargo político. O delegado da Fundación Galicia Emigración en Uruguai, Xosé Antón Fernández, presentou a súa dimisión. Fernández, que tamén é o máximo representante do PSOE no país sudamericano, deixa o cargo poucas horas despois de que o fixera Pilar Pin, directora da controvertida fundación. Segundo o xornal La Voz de Galicia, o cargo socialista presentou a súa renuncia o mesmo mércores, mais ista non acabou por materializarse até o xoves.

A polémica entrega en man dos cheques asistenciais foi visto por todos os partidos como un acto partidista con medios públicos. O PPdeG comezou unha ofensiva na que xa solicitou o cese do Secretario Xeral de Emigración, Manuel Luis Rodríguez, e até lle pide responsabilidades directas ao conselleiro da Presidencia, Xosé Luis Méndez Romeu. O sucedido tamén está a dificultar as relacións cos nacionalistas, que acusan ao PSdeG de herdar o “modus operandi” dos populares.