Vieiros

O Consello da Cultura galega publicou hoxe un libro electrónico que analiza o presente da cultura galega na rede. "I+C. Oportunidades e desafíos para a cultura galega en Internet" conta con contribucións da xornalista Belén Regueira, o avogado Victor Salgado, o profesor Marcos Valcárcel e o produtor Pancho Casal, entre outros moitos profesionais da cultura e do sector de internet.

O lanzamento deste e-libro forma parte das actividades programadas pola Xunta na campaña "Máis internet, máis galego, máis futuro", que busca promover os contidos galegos aproveitando as celebracións do 17 de maio, que é o Día das Letras Galegas e o Día de Internet.

Blogs e dereitos de autor
Os problemas coa propiedade intelectual no ciberespazo e o “boom” das achegas dos internautas aos contidos son algúns dos aspectos tratados. E é que o obxectivo da publicación, segundo a Xunta, é “analizar o momento actual da rede para que os profesionais galegos da cultura poidan detectar oportunidades de difusión do patrimonio galego a través das novas tecnoloxías”.

A publicación foi presentada no Cultur.gal, a feira do Libro e da Industria Cultural que comezou hoxe en Pontevedra. Na xornada inaugural, Cultur.gal organizou un debate sobre a cultura galega no ciberespazo. O editor Víctor Freixanes e Carlos Santiago, do colectivo Arredemo, foron algúns dos relatores.