Vieiros

Vieiros de meu Perfil


Edición xeral

RSS de Edición xeral
OPINIÓN

A Margarita Bellas Miragaya, in memoriam

A sindicalista Laura Bugallo escribe un artigo en lembranza de Margarita Bellas. Este sábado 12 de maio, ás 12 horas, esparexeranse as súas cinzas na praia de Cobas en Ferrol.

Redacción - 17:41 11/05/2007

Desde Compostela reivindico a tua estadia con nós, Compañeira, Loitadora social incansábel de causas dun outro mundo mellor, por ti Marga calquera iniciativa social na que nos acompañamos pagaba e seguirá pagando a pena.

Amiga desa revolución silenciosa, dese traballo sindical, ese traballo a prol dunha boa acollida en defensa dos direitos das persoas imigrantes e retornadas, e sempre desde esa clave e perspetiva de xénero.

Organizadora de eventos significativos en Ferrolterra, e participante activa noutros en Galiza, sempre coa palabra precisa e acesa, con esa humildade que precede ás mulleres valentes, donas de si, comprometida e comprometedora de quen con ela gustabamos de estar.
Houbo quen en vida te vilipendiou, para elas e eles a miña ignoráncia suprema, oportunistas doutrora que morden as mans que lles adicou tempo e cariño. A elas quédalles o veleno da sua língua.

Foise, nótase en Ferrol, na bisbarra, en Galiza, en moitas persoas e familias recén chegadas de alén dos mares, e tamén alá onde se ia ir co seu Compañeiro, o meu camarada Miño, a morar no paisito, no de Artigas, no do Viejo Pancho, no do Pepe, do Ñato, de Tabaré... Ian-se reencontrar nesa pátria amada por nós, terra de acollida singular de Galiza, refúxio sen parangón de tantas e tantos galegos.

Margarida Bellas Graña, foi alma mater de ASMIREFE, reivindico o teu nome como semente para a nosa terra. Galiza precisa exemplos coma o teu. Todas as palabras de quen te coñeceu e amou son poucas.

Compañeira da CIG, Compañeira na defensa dun outro mundo mellor, coa dor da tua auséncia impregno o calendário co alento de ti que en min, en nós, pervivirá sempre. Por ti vaia este mate amargo.

Autora do artigo: Laura Bugallo


4/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: