Vieiros

Segundo unha sondaxe encargada polo Partido da Social Democracia Brasileira (PSDB), na oposición, de se poder presentar o presidente do goberno do Brasil, Luiz Inácio Lula da Silva volvería saír reelixido para un terceiro mandato, cun 56% do apoio das 3.500 persoas consultadas de todo o país. Porén, a lexislación actual impide esta posibilidade.

A información da que se fai eco o xornalista brasileiro da Folha de São Paulo Josias de Souza, a dirección do PSDB mantén os resultados ocultos polo de agora namentres non "dixire os datos". A enquisa está composta de 65 preguntas, elaboradas polo sociólogo Antonio Lavareda e polo deputado do PSDB Gustavo Fruet.

Programas sociais, o máis valorado
Ademais, a sondaxe pon de manifesto que malia os casos de corrupción, o Partido dos Trabalhadores (PT) volvería ser a forza máis valorada polos electores, por diante do Partido do Movimento Democrático Brasileiro (PMDB), que ficaría en segundo lugar, e do PSDB, no terceiro.
O presidente Lula da Silva obtivo unha taxa de aprobación que supera en máis de vinte puntos porcentuais á de desaprobación. Ademais, de acordo co resultado da enquisa, os programas sociais do goberno son os mellor valorados polos electores.