Vieiros

A preservación do medio ambiente e os espazos naturais, un novo réxime de valoracións do chan e novos mecanismos de transparencia e control son algúns dos puntos máis salientábeis da lei, que tamén pretende promover a participación cidadá na elaboración dos plans urbanísticos municipais. O fomento da construción de vivenda protexida e o freo á corrupción urbanística son os principais obxectivos: eleva ao 30% a cota do chan que se debe estabelecer para vivendas de protección oficial

Incide no coñecemento por parte da cidadanía das decisións de tipo urbanístico que se toman nos concellos e as súas consecuencias: obrígaos a facer pública a identidade de quen fose propietario durante cinco anos dos terreos nos que aumente a edificabilidade ou se modifique o uso. Esixe tamén que todos os convenios urbanísticos e permutas de terreos sexan acordados polo pleno municipal. Ademais, alcaldes, concelleiros e cargos non electos dos gobernos locais deben declarar, antes de tomaren posesión, as súas actividades económicas e posíbeis incompatibilidades, bens patrimoniais e participacións en sociedades.