Vieiros

O seu mestre, Lee Dong Kyu, foi quen lles ensinou en Ourense a manexar a espada como levan séculos facendo os coreanos. O ximnasio ourensán que el mesmo dirixe é pioneiro nesta arte e encargado de difundila por todo o Estado, a través da Asociación Española de HDGD (Haidong Gumdo, o nome coreano desta arte marcial), que tamén preside.

A fin de semana do 15 ao 17 de xuño os ourensáns e mailas súas espadas, proclamáronse campións de Europa en Baar, (Suíza), na primeira proba da historia europea deste deporte. Aló estaban tamén equipos do país anfitrión, de Francia, do Reino Unido, de Irlanda, Holanda, Suecia, Noruega, Finlandia, Italia e Alemaña.

Os seus mestres tamén son estrelas de cine
Durante o campionato tamén houbo un chisco de tempo para as exhibicións, cun equipo profesional coreano que deixou aos europeos pasmados co seu manexo da espada. Outro dos convidados foi Danny John-Jules, secretario de honra da Asociación Británica de HDGD, quen, ademais, é un dos protagonistas do filme Blade 2, onde move a espada detrás dos vampiros malos.

N'O carballiño tamén saben manexar a espada
Do Estado tamén viaxaron equipos de Sevilla, Valencia e O Carballiño, onde tamén chegaron, segundo parece, as ensinanzas de Lee Dong Kyu, que tamén dirixe a selección estatal, que volveu de Suíza con tres ouros, catro pratas e dous bronces.