Vieiros

Vieiros de meu Perfil


Edición xeral

RSS de Edición xeral
Novo espazo de vídeos

A Galega crea a súa primeira "web informativa"

Estrea un novo servizo cunha clasificación temática e xeográfica de noticias e a posibilidade para os internautas de enviaren vídeos.

Redacción - 14:15 09/07/2007

Aínda que lonxe da ambición informativa das webs da televisión catalá, Telenoticies.cat, ou da vasca, EiTB24, a CRTVG dá un pequeno e significativo paso na organización dos seus contidos en internet.

A procura de informacións segundo a súa temática (economía, deporte, cultura...) ou segundo localización xeográfica (dispoñíbeis as sete principais cidades e a comarca da Mariña) é unha das novidades do espazo Agalega.info. Fornécese tamén a función "Envía o teu vídeo", para recibir as propostas audiovisuais dos usuarios da páxina. Desde a CRTVG avanzan que en breve se poderá acceder tamén aos textos das noticias e haberá un espazo similar onde se organicen os contidos máis importantes do día na Radio Galega.

Desde a compañía pública explican que se trata de "gañar posicionamento nunha canle como internet, cun perfil de usuarios diferente á televisión e á radio convencionais, con predominio de usuarios de menor idade". Consideran ademais que internet é o "medio ideal" para contactar novos públicos e "comunicar os profundos cambios na programación que se viñeron producindo ao longo destes dous últimos anos". Por outra parte, destacan que desde o mes de outubro a web da CRTVG vai camiño de duplicar o seu número de visitas, pasando das 17 mil que contaba naquela altura a unha media de 30 mil visitas diarias na actualidade.


4.83/5 (6 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: