Vieiros

Vieiros de meu Perfil


Tempos Novos

Xestionado por Tempos Novos
RSS de Tempos Novos
SEN CORSÉ

Porno-mol (un cadro de costumes)

Ton de sátira amábel. Un cuarto á noite. Poderían ser tres, pero son dous. De orixe social humilde, algo ascenderon. É doado detectar certo esnobismo na decoración. Láminas chinesas, luz incidental, orde alfabética nos libros dos andeis. Máis ou menos guapos, case sempre dormen espidos. Levan xuntos o tempo suficiente. Aínda non aborreceron por completo o corpo do outro. Un conto erótico de María do Cebreiro ilustrado por Xosé Carlos Hidalgo.

TEMPOS Novos - 12:00 27/07/2007

-Gústache así?
-Así como?
-Non te vexo eu moi centrada.
-Pois eu a ti véxote moi técnico.
-Prefires que paremos?
-Para, anda, para.

[Silencio]

-Lembras cando nos coñecemos?
-Lembro o primeiro abrazo.
-Gustoume sentir aquilo.
-O da pistola?
-Vas armado ou alégraste de verme?
-Esa estivo moi ben.
-E por que unha pistola?
-Preferirías nabo?
-Mira que es literal, cona.
-Nabo é unha metáfora.
-Aínda se che nota que es de letras.
-Que pasa, que aos de ciencias non vos gusta?
-O que?
-As escenas de cama.
-Ti xoga, xoga.
-Ai, que medo me dás.

[Silencio]

-Cansácheste de min?
-Non ten que ver con iso.
-Aínda pensas nel?
-A ti non che dixeron que hai cousas que é mellor non preguntar?
-Quero saber se che gustaba máis.
-Xa che dixen que non significou nada.
-Iso é un tópico.
-No sexo, todo é un tópico.
-E no amor non?
-Odio falar de amor.
-Pois eu quérote.
-Calado estás tan guapo.

[Silencio]

-Non sei por que, pero Mae West dáme un pouco de grima.
-Tiña a cara moi ancha.
-Eu pensaba máis ben na súa agresividade.
-Se es boa vas ao ceo.
-Se es unha mala pécora vas a todas partes.
-Pois vaia teoría da pataca.
-Supoño que o escribiu un guionista.
-O que me gustaría a min é ser tan boa como para ir ao inferno.
-O que che gusta a ti é ir ao Ribeiro e levar as uvas á merenda.

[Silencio]

-Tentámolo de novo?
-Si, home, si.
-Non é tan tarde.
-Faino ti só.
-Iso é o que che gusta?
-Mirar sen facer nada?
-Vaina rañar
-Durmimos?

Conto publicado na edición impresa de TEMPOS Novos (nº 122, xullo de 2007)


4.14/5 (14 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: