Vieiros

Vieiros de meu Perfil


Lusofonía

Xestionado por Vieiros
RSS de Lusofonía
Un día despois de que Xanana Gusmão fose nomeado primeiro ministro

Protestas en Timor Leste contra o novo membro do executivo

Na segunda feira houbo varios episodios de violencia no país, nos que os simpatizantes da Fretilin bloquearon estradas con pneumáticos ardendo. Mentres, a Fretilin falaba de golpe de estado.

Redacción - 11:18 07/08/2007
Gusmão foi elexido primeiro ministro, a pesar de non ser o máis votado

Gusmão foi elexido primeiro ministro, a pesar de non ser o máis votado

O Presidente de Timor Leste, José Ramos-Horta, convidou esta segunda feira a Xanana Gusmão, a quen sucedeu en maio, para formar con el goberno, con base na Aliança com Maioria Parlamentar (AMP). Esta coalición foi constituída por catro partidos despois das lexislativas do 30 de xuño, onde non está a Fretilin, o partido máis votado, co 29 % dos votos emitidos.

Ramos Horta dixo ter procurado unha "solución o máis abranguinte posíbel", ao convidar a Gusmão , do Congresso Nacional da Reconstrução de Timor-Leste (CNRT), para formar con el goberno, xa que non se puido chegar a unha "converxencia de vontades". Mais para o líder da Fretilin, Mari Alkatiri, a elección do novo primeiro ministro está a raiar a "inconstitucionalidade", xa que, nas súas palabras, trátase "dun golpe de Estado".

Obviando as posíbeis reaccións da Fretilin, Ramos Horta terminou o seu discurso, xa escrito hai cinco días, afirmando que o novo executivo "terá de respectar toda a oposición e os seus diferentes puntos de vista", e tamén tivo palabras de aprecio para os que "teñen gobernado e tomado conta da vida pública segundo o interese xeral", referíndose á Fretilin, e a seu líder, Mari Alkatiri, en quen dixo ter atopado "serenidade e sentido de Estado".

Comezan as protestas
Mais isto non foi suficiente para que a violencia non tivese xurdido de inmediato, primeiro en Baucau e despois en Díli, na capital, por parte de grupos simpatizantes da Fretilin, que lanzaron pedras, bloquearon estradas e queimaron pneumáticos. Nalgúns campamentos de refuxiados penduraron cartaces nos que se podía ler: "Xanana é un fantoche" e nos que se acusaba o antigo Presidente de estar baixo a influencia da veciña Australia e da Administración Bush.

Segundo fontes policiais, algúns edificios foron destruídos por un incendio, mais segundo algúns enviados da TV portuguesa en Timor, os incidentes non foron máis graves que os de outras veces.

Preto do 10% da poboación total timorense está aínda a vivir en condicións precarias, en campamentos ou residencias provisionais, o que axuda a potenciar a axitación social e fai que se despracen até alí, diariamente, policías e militares estatais e internacionais.


5/5 (4 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: