Vieiros

Media ducia de activistas estranxeiros (de Canadá, do Reino Unido e dos EUA) foron detidos este martes na Grande Muralla Chinesa logo de despregaren unha pancarta co lema One World, One Dream, Free Tibet 2008 (Un mundo, Un soño, Liberdade para o Tibet 2008), que parafrasea o dos Xogos Olímpicos de Pequín: One World, One Dream.

Os manifestantes ademais de pedir a independencia do Tíbet acusaban ao Comité Olímpico Internacional de eximir a China da súa responsabilidade na vulneración dos dereitos humanos no país. A protesta prodúcese a un ano do comezo das Olimpíadas en Pequín, o 8 de agosto de 2008.

Informe de AI
Con motivo desta data, Amnistía Internacional (AI) acaba de facer público un informe no que advirte de que "a imaxe dos XXOO poderíase ver seriamente danada de non remataren os abusos por parte das autoridades chinesas".

Segundo AI, varios activistas con base na capital seguen baixo detención domiciliaria e baixo fortes medidas de vixilancia policial. Ademais, asegura que continúa a campaña represiva contra xornalistas locais e contra publicacións sobre desenvolvemento e sociedade civil.

"Os comunicados oficiais xustifican estes abusos en beneficio da harmonía e da orde social", sinalan dende AI, que no entanto recoñece avances positivos nos últimos meses no que á pena de morte e a liberdade de prensa dos profesionais estranxeiros se refire.