Vieiros

Malia ser man dereita do alcalde, Xavier Losada, e ter entre as súas atribucións de goberno, ademais de Educación e Festas, responsabilidade na área de Relacións Institucionais, o concelleiro Carlos González Garcés semella non ter as habilidades diplomáticas cuxa ausencia xa se lle reprochaban ao anterior rexedor coruñés, Francisco Vázquez.

Así, González Garcés declaraba esta semana que o interese do BNG para que os cativos coñecesen o himno desde o xardín de infancia seica lle lembraba o tempo en que lle "obrigaban a cantar o Cara al sol".

Os socios nacionalistas no concello herculino transixían este mércores coas afirmacións de Garcés. "Trátase simplemente dunha falta de respecto propia de persoas desnortadas politicamente que non se decatan de que en Galiza e na Coruña existe unha situación política diferente que fai a sociedade cos seus votos", comentaba, Henrique Tello, voceiro do BNG na cidade e primeiro tenente de alcalde no Concello. Tello criticou a "mala fe" e "falta de respecto" do que na súa opinión son exemplo as declaracións de Garcés e chamou a "non alimentar a polémica". Tello referiuse á frase "as cousas de Garcés", acuñada polos propios compañeiros do socialista no PSdeG local para referirse ás extemporáneas ocorrencias de Garcés Santiso.