Vieiros

Vieiros de meu Perfil


Máis Alá

Xestionado por Vieiros
RSS de Máis Alá
'Facer país'

'A Nosa Terra' recibirá o VI premio Ramón Piñeiro

As asociacións da comarca de Sarria recoñeceron o compromiso da centenaria publicación coa identidade nacional.

Redacción - 13:00 30/08/2007
Vila Tourón, López Sierra, Darío Piñeiro, Aníbal Piñeiro e Rodríguez Lozano

Vila Tourón, López Sierra, Darío Piñeiro, Aníbal Piñeiro e Rodríguez Lozano

O semanario A Nosa Terra, que cumpre este ano o seu centenario, foi galardoado co VI Premio Ramón Piñeiro “Facendo país”. O xurado do premio, formado por representantes de 18 asociacións da comarca de Sarria e do val do Neira, valorou a defensa da identidade nacional que leva facendo a publicación por riba das continxencias políticas, sociais e económicas.

Na acta do premio tamén se salienta o labor de compromiso do periódico coa terra, coa normalización lingüística, e o feito de que contribúa á recuperación da nosa memoria a través das novas redes de difusión.

A Nosa Terra foi escollida de entre 42 candidaturas achegadas por asociacións de todo o país. O secretario da asociación Val de Láncara, Carlos López Sierra, salientou o feito de que o premio, que non ten dotación económica, se concede á marxe das empresas e editoriais.

O acto de entrega do premio terá lugar a finais de setembro ou a mediados de outubro. O galardón, unha obra dun artista do país, será entregado polo gañador da pasada edición, Xosé Neira Vilas. O premio que concede a Asociación Cultural Val de Láncara recoñece cada ano unha persoa ou institución que destaque pola defensa da nosa cultura e identidade. Os anteriores premiados foran Isaac Díaz Pardo, Luís Tosar, o grupo Milladoiro, Xosé Manuel Beiras e Xosé Neira Vilas.

O fallo deuse a coñecer no Club Internacional de Prensa, nun acto en que estiveron presentes o irmán de Ramón Piñeiro, Aníbal Piñeiro; o secretario de Val de Láncara, Carlos López Sierra; un representante das asociacións de Sarria, Xesús Vila Tourón; o director do Colexio Ramón Piñeiro, Xurxo Rodríguez Lozano, e o alcalde de Láncara, Darío Piñeiro.


1/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: