Vieiros

A case corenta anos da súa fundación, a axencia espacial estadounidense NASA anunciou que por primeira vez na súa historia permitirá que a xente acceda a través de Internet, e de xeito gratuíto, á súa colección de fotografías e películas sobre a exploración e as investigacións espaciais.

Con ese obxectivo, a axencia espacial estadounidense creou coa empresa Internet Archive de San Francisco, unha sociedade que porá a disposición de todo o mundo unha ferramenta de utilidade para historiadores, estudantes e investigadores, segundo describiu a NASA nun comunicado.

Na actualidade, a NASA conta con máis de 20 coleccións de imaxes dispoñibles online, pero a sociedade con esta empresa de San Francisco permitirá que estas series de imaxes se poidan baixar mediante un arquivo único. "Este é un servizo de tremendo valor xa que facilitará o acceso a importantes imaxes da exploración científica e espacial", explicou Robert Hopkins, director de comunicados da NASA en Washington.

Brewster Khale, bibliotecario dixital e fundador de Internet Archive, sinalou que o acordo cumpre co propósito da súa empresa de pór "todo o coñecemento humano no reino dixital e a disposición de todos".

"O valor educativo das imaxes que a NASA coleccionou e seleccionado durante o curso das súas cinco décadas de descubrimentos científicos espaciais non ten precedente", agregou Khale. En virtude do acordo, que durará cinco anos, Internet Archive" dixitalizará, recibirá e controlará as imaxes producidas pola NASA.

Ademais, a compañía traballará coa NASA para crear un sistema mediante o cal será posible catalogar e arquivar automaticamente todas as imaxes.

Ese arquivo tamén incluirá arquivos de audio, documentos impresos e presentacións informáticas, segundo o comunicado distribuído onte pola axencia espacial estadounidense.

Internet Archive está localizado no parque Presidio da cidade de San Francisco, en California, e é unha organización sen fins de lucro que garda copias de practicamente todo o contido que existe en Internet.

Este sitio permite facer "capturas" de pantallas e tamén mantén coleccións de audios e vídeos.