Vieiros

A Consellaría de Cultura vai declarar Bens de Interese Cultural (BIC) os vinte castros máis sobranceiros do país, que se sumarán aos de Elviña, na Coruña, e Santa Tegra, na Guarda, que xa contaban con ese recoñecemento. Á hora de seleccionar os monumentos tivéronse en conta criterios de conservación e de calidade do rexistro arqueolóxico.

A provincia de Lugo é a que terá máis castros recoñecidos como BIC, sete: Fazouro en Foz, Viladonga en Castro de Rei, Santa María do Castro en Cervantes, Castromaior en Portomarín e Vilar e a Torre en Folgoso do Courel. Engádense cinco poboados castrexos da provincia da Coruña: Punta dos Prados en Ortigueira, Cidá de Borneiro en Cabana de Bergantiños, Baroña en Porto do Son, Neixón en Boiro e Lupario entre Rois e Brión.

En Ourense sitúanse outros cinco: Santomé na capital, Castromao en Celanova, Coto do Mosteiro no Carballiño e Saceda e San Millán en Cualedro. Completan a listaxe tres castros pontevedreses: Donón en Cangas, Troña en Ponteareas e Penalba en Campo Lameiro.

Axiña comezarán os trámites necesarios para o recoñecemento, mediante estudos de definición e delimitación dos castros. A consellaría investirá neste labor 37.200 euros. Por outra banda, Cultura está a crear o Parque Arqueolóxico da Cultura Castrexa no castro de San Cibrao de Las, entre San Amaro e Punxín. As instalacións, de máis de 25 hectáreas, comezarán a funcionar en 2009.