Vieiros

Vieiros de meu Perfil


Bos Aires

Edición xestionada por Débora Campos
RSS de Bos Aires
DÍA DO INMIGRANTE EN ARXENTINA

"As correntes migratorias non se paran con exércitos"

Iso dixo o o director de Migracións da Arxentina, Ricardo Rodríguez, na data dedicada aos que chegaron ao país. Lembrou que 700 mil estranxeiros regularizaron a súa situación.

Débora Campos - 17:00 05/09/2007

O ritmo de radicación acelerouse a partir do ano 2006 na Arxentina, cun plan oficial orientado a facer máis rápidos os trámites das persoas nacidas en países limítrofes e do Mercosur, segundo asegurou este martes o director de Migracións durante o acto do Día do Inmigrante.

Segundo informou Ricardo Rodríguez, responsable de Migracións, o Programa Patria Grande, que se puxo en marcha a principios de 2006, legalizou así a radicación de 485.578 inmigrantes, dos cales 413.684 ingresaran ao país antes de abril de 2006, e 71.894 fixérono logo desa data.

O programa foi creado para impulsar a regularización da situación migratoria dos estranxeiros nativos dos Estados que integran o Mercosur e os países asociados, co obxecto de facilitar o trámite para accederen a unha residencia legal no país.

Afrontar a realidade

"O problema de non afrontar a realidade derivaba nun prexuízo para o país, como todo o que resulta de acudir a restrinxir sen buscar unha solución superadora, porque esa política expulsiva, fai máis lucrativo o tráfico e venda de persoas e todos os delitos que se alimentan da vulnerabilidade humana", afirmou aos xornalistas, segundo a axencia Telam.

Segundo as cifras oficiais, o 53% do total de inmigrantes regularizados en todo o período provén do Paraguai, 27% de Bolivia, 12% de Perú, 2,7% do Uruguai, 2,1% de Chile, 1,5% do Brasil, 0,9% de Colombia, 0,5% de Ecuador e 0,2% de Venezuela.

Os datos foron revelados durante un encontro realizado no emblemático Hotel dos Inmigrantes, situado no barrio porteño de Retiro, para celebrar o Día do Inmigrante. "As correntes migratorias non se paran con exércitos. O dereito á migración é un dereito humano. Neste sentido, a política migratoria que se desenvolveu a partir de 2003 tiña como base non a seguridade senón os dereitos humanos", explicou Rodríguez.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Ricardo Rodríguez, Director Nacional de Migracións falando no Día do Inmigrante. Foto: Juan Roleri/Télam
Ricardo Rodríguez, Director Nacional de Migracións falando no Día do Inmigrante. Foto: Juan Roleri/Télam
Varias colectividades participan da festa. Foto: Juan Roteri / Télam
Varias colectividades participan da festa. Foto: Juan Roteri / Télam