Vieiros

O Sindicato Xeral de Traballadores da Industria Pesqueira Actividades Conexas (SGTIPAC) ten en marcha unha campaña en contra das “prácticas antisindicais” da conserveira Calvo no Salvador. O Sindicato denuncia que a empresa galega usa gardas armados, e mesmo chegou a solicitar ao Goberno a intervención dos militares, para “non permitir máis actividades de propaganda do sindicato lexítimo nos arredores da fábrica ou a visita de sindicalistas estranxeiros”.

Segundo o SGTIPAC a compañía despediu a algúns dos seus sindicalistas e está a promer un sindicato vertical para calmar as protestas no porto de la Unión.

Condicións hixiénicas
Entre as prácticas denunciadas, destacada o encadeado dos baños da factoría, para impedir que os traballadores acudan libremente ao lavabo sen o control dun supervisor. “Que pensarán os consumidores cando saiban que na planta de El Salvador as traballadoras defecan no chan porque os baños están con candados?”, pregúntase a web do SGTIPAC.

Polígrafos para detectar sindicalistas
Segundo representantes dos traballadores, a empresa chegou a someter aos traballadores a polígrafos para descubrir que persoas participaban nas mobilizacións sindicais. A organización tamén alerta que o grupo galego está a utilizar bandeiras de conveniencia nos seus buques.

O Sindicato di que xa se produciron varios accidentes laborais nos barcos. “O obxectivo de Calvo é buscar man de obra barata, non traer mellores condicións para os traballadores nin para os países nos que se instala”, conclúe o SGTIPAC.