Vieiros

A web de Radio Sada incluíu unha nova sección que está a recibir moitas visitas. Un apartado especial dedicado ao Pazo de Meirás recolle todo tipo de vídeos sacados de programas de televisión e da biblioteca virtual Miguel de Cervantes dedicados á edificación, dende imaxes do NO-DO até conexións en directo.

Na páxina, o pazo é o protagonista, non só nos vídeos senón tamén en noticias e ligazóns como unha petición en liña para a declaración de Meirás como Ben de Interese Cultural. Tamén se ligan textos sobre a historia do edificio, construído por iniciativa da escritora Emilia Pardo Bazán e que acabou nas mans do ditador Francisco Franco a través dunha Junta provincial pro pazo del Caudillo encabezada por Pedro Barrié de la Maza e o gobernador civil Julio Muñoz Aguilar.