Vieiros

A Asemblea da República de Portugal acaba de aprobar un novo Estatuto do Xornalista. O texto establece que os informadores deben revelar as súas fontes se hai unha investigación xudicial en marcha.

O dereito dos xornalistas a manter en segredo a identidade de quen lle revela unha noticia é unha das bases da liberdade de prensa. Por exemplo, o artigo 20 da Constitución Española recolle especificamente esta garantía profesional fronte as presións do poder.

Detención dun xornalista
O Sindicato de Jornalistas de Portugal (SJ) alerta que “esta medida foi aprobada precisamente no día en que se fan cinco anos sobre a detención do xornalista Manso Preto, que recusou revelar unha fonte confidencial nun xuízo no que era testemuña”.

Por outra banda, o novo Estatuto, aprobado o día 20, permitirá aos editores a modificar os textos dos xornalistas sen o consentimento dos informadores.

Por iso o SJ entende que se “crean as condicións para aniquilar os puntos de vista e as análises que, nas democracias, posibilitan o enriquecemento da opinión pública”.

Solidariedade dende Galiza
Ademais de modificar as noticias, a Lei permite aos editores volver a publicalas sen permiso dos xornalistas e sen pagarlles. Ante esta situación, o o SJ xa recibiu a solidariedade da Federación Europea de Xornalistas e tamén do Sindicato de Xornalistas de Galicia.