Vieiros

Un piquete dun cento de persoas logrou deter este mediodía as obras do tren de alta velocidade no concello de Lalín, segundo fontes sindicais. A segunda xornada da folga no sector da construción da provincia de Pontevedra consigue así un dos seus obxectivos principais, deter a principal infraestrutura pública que se está a construír en Galiza.

Os sindicalistas aseguran que non se produciron incidentes importantes, só “rife-rafes”. Con todo, indican que algúns deles foron identificados pola Garda Civil. A causa parece ser as denuncias dos empresarios, que din que os piquetes desincharon as rodas de varios vehículos das obras do AVE.

Parado o novo Consistorio
Antón Merallo, responsábel da CIG en Lalín e A Estrada, explica que “en Lalín o paro é total, incluída a construción do novo edificio do Concello”. Segundo Merallo, na capital do Deza detivéronse unhas 22 construcións tras a chegada dun piquete de Pontevedra.

O sindicalista afirma que os traballadores da Comarca están “moi receptivos” ás demandas dos folguistas, malia as trabas postas por algúns encargados de obra. En particular Merallo destaca a colaboración dos “moitísimos” traballadores portugueses, man de obra fundamental nas subcontratas do AVE.

“Explicámoslles, en galego, que loitamos por un convenio común, que tamén se lle aplicará a eles, e pararon” dixo o membro da CIG.

Xornadas de 12 horas
Os asalariados lusos son os que sofren as peores condicións laborais, con xornadas de ata 12 horas ao día, segundo denunciou o responsábel do sector da construción, Xesús Varela, nesta entrevista.

A Xunta quere mediar
A folga na construción da provincia de Pontevedra está convocada por CIG, UXT e Comisións. Está previsto que mañá continúe, así como os días 9 e 10 deste mes. Se non hai acordo será indefinida a partir do día 16.

Polo de agora non hai contactos entre sindicatos e patronal, malia que a Consellería de Traballo prometeu onte que ía facer de intermediario.