Vieiros

A gañadora do premio Nobel de Literatura deste ano, a británica Doris Lessing, demostra que a súa idade -fará 88 anos o 22 de outubro- non lle impide dominar as novas tecnoloxías. Así, conta cun perfil en MySpace, rede social coñecida por ser usada masivamente pola mocidade e por grupos musicais que promocionan alí as súas creacións.

Aínda que polo momento só inclúe unha biografía e se advirte de que non segue habitualmente a páxina, o certo é que xa son máis de 250 as persoas que forman parte da súa lista de amigos, entre as que hai, tamén, xente que supera os 80 anos de idade. Todos teñen palabras de admiración e parabéns por ter gañado o prezado premio.