Vieiros

O ex primeiro ministro británico Tony Blair é o candidato favorito para ser o primeiro presidente permanente da Unión Europea (UE), un cargo que se crea co Tratado de Lisboa, aprobado polos líderes europeos esta semana, e que comezará a traballar o 1 de xaneiro de 2009.

Tanto o seu sucesor, Gordon Brown, como o presidente francés, Nicolas Sarkozy, afirmaron que Blair faría ben o traballo aínda que recalcaron que é prematuro para falar da repartición de cargos.

Ademais, Blair xa está a facer un traballo como enviado especial do Cuarteto para Oriente Próximo, engadiu Brown. Sarkozy salientou que Blair "é un home notábel, o máis europeo dos ingleses", porén tamén puxo sobre a mesa o nome do primeiro ministro luxemburgués e presidente do Eurogrupo, Jean-Claude Juncker.

De acordo co Tratado de Lisboa, o presidente da UE será elixido polos líderes europeos para un mandato de dous anos e medio renovábel unha soa vez. Entre as súas tarefas atópase presidir o Consello Europeo, preparar os seus traballos e garantir a súa coherencia, así como garantir a representación exterior da Unión, tarefa que compartirá co novo Alto Representante.

Satisfacción de Sócrates e Barroso
O primeiro ministro portugués e presidente de quenda da UE, José Sócrates, e o presidente da Comisión Europea, José Manuel Durão Barroso, coincidiron este venres en sinalar a importancia do acordo sobre o Tratado de Reforma

Segundo sinalaron en rolda de prensa conxunta, o texto que substitúe ao proxecto fracasado de Constitución Europea permitirá unha Europa máis forte para liderar no mundo e para facer fronte aos retos da globalización.

Poden completar a información na web da Unión Europea dedicada ao cumio de Lisboa (en inglés).