Vieiros

Francisco Jorquera (A Coruña); Olaia Fernández Davila (Pontevedra); Iago Tabarés (Ourense); e Paz Abraira (Lugo) son os catro ases propostos pola Executiva Nacional do BNG para encabezar as candidaturas ao Congreso dos Deputados. Agora serán as asembleas comarcais e o Consello Nacional os que deben de referendar a proposta do máximo órgano do Bloque. O proceso rematará o vindeiro día 9 de novembro.

O propio coordinador executivo, Francisco Jorquera, foi o encargado de facer públicas as propostas. Jorquera subliñou que a organización frontista encara os comicios co reto de "dar un salto cualitativo e pasar a ser unha forza coa que hai que contar sempre para a gobernabilidade do Estado". Dende o BNG tamén fan fincapé na paridade de xénero nas cabezas de lista.

Fontes da organización nacionalista consultadas por Vieiros sinalan que o obxectivo primordial é consolidar a actual representación nas circunscricións da Coruña e de Pontevedra. O terceiro deputado pasaría por un notábel e complicado aumento de votos en Ourense mentres que se ve case imposíbel lograr unha acta en Lugo.

Poden consultar o currículo dos candidatos (.pdf) na páxina do BNG.