Vieiros

Bieito Seara recibiu en San Caetano aos oito deportistas galegos de Special Olympics Galicia que participaron, formando parte da delegación de Special Olympics España, nos Xogos Mundiais de Verán de Xangai, que se celebraron do 28 de setembro ao 11 de outubro.

Durante a recepción, os representantes da Vicepresidencia da Xunta aproveitaron para falar da súa colaboración con Special Olympics Galicia, que este ano se materializa nunha achega de 180 mil euros, na que se inclúe a participación nesta iniciativa.

Os Special Olympics Galicia
Os deportistas das asociacións ASPAS de Compostela e de ASPRONAGA da Coruña participaron, xunto cos demais membros do equipo estatal, nas modalidades de baloncesto e de fútbol 5, acadando a medalla de bronce en baloncesto ao gañar a Austria por 12-7. En fútbol sala conseguiron o cuarto posto ao seren derrotados por India cun resultado de 0-6.

Os baloncestistas galegos que viaxaron a Xangai foron, polas ASPAS, Antonio Fernández e José Luís Pérez; e Sergio Barbeito e Juan Antonio Otero, pola ASPRONAGA. En fútbol 5 competiron Jesús Cabo, Juan Carlos Sánchez e José Leopoldo Sastre, pola ASPAS; e Luís Esteban Vilar pola ASPRONAGA.

O maior evento deportivo mundial para discapacitados intelectuais
Nos Xogos Mundiais de Verán de Xangai participaron 7.200 atletas de 163 países. Estes xogos son previos á celebración dos Xogos Olímpicos do vindeiro ano na capital chinesa e convertéronse no maior evento deportivo mundial de recoñecemento ao colectivo de persoas con discapacidade intelectual.