Vieiros

As prostitutas da cidade boliviana de El Alto, próxima á capital, La Paz, iniciaron unha serie de accións de protesta para demandar que volvan abrir os seus locais de traballo. Os bares, discotecas e bordeis en que traballaban foron saqueados por unha multitude descontrolada e logo pechados polo concello.

As prostitutas atópanse dende o luns en folga de fame. O día seguinte, dirixentes dunha asociación de locais de diversión uníronse a elas para apoialas. O mércores, as mulleres decidiron coser os seus beizos con fío como un paso máis na súa loita. Para o xoves tiñan previsto enterrarse vivas, como anunciou unha representante das traballadoras nocturnas da cidade: “Farémolo se non nos escoitan de inmediato. O alcalde vai levar na súa conciencia calquera consecuencia grave, como a morte das miñas compañeiras”.

O alcalde, Fanor Nava, dixo que non pensa revisar o peche masivo dos prostíbulos, que decretou a semana pasada despois dunha serie de manifestacións violentas contra eses negocios. De feito, representantes de estudantes tamén están en xaxún para esixir o peche definitivo dos estabelecementos nocturnos.

Pola súa banda, os hostaleiros alertan da posibilidade de que a clausura indefinida dos locais provoque máis conflitos sociais, pois afectaralles, ademais de aos empresarios e ás prostitutas, a camareiros, cociñeiros, taxistas e vendedores ambulantes.

Segundo un informe do alcalde de El Alto, cidade de preto dun millón de habitantes, a semana pasada funcionaban máis de 2.000 bordeis, bares e discotecas, dos que máis do 70 por cento eran ilegais.