Vieiros

Vieiros de meu Perfil


Edición xeral

RSS de Edición xeral
Comisión de investigación da Cidade da Cultura

Pérez Varela evita dar contas da "rede de intereses" tecida arredor do Gaiás

Cruzáronse duras palabras Xesús Pérez Varela e o voceiro do BNG, Carlos Aymerich, logo de que o nacionalista dese detalle dos "negocios" presuntamente tecidos polo ex conselleiro arredor do proxecto do Gaiás.

Redacción - 14:40 29/10/2007

"Vai máis aló dun proxecto de partido, é de pobo, de país, de nazón", afirmou o ex conselleiro de Cultura, Xesús Pérez Varela, nun inicio da súa intervención onde non reparou en cualificativos para unha obra que definiu como "a máis emblemática" e a "máis importante" para "o presente e o futuro de Galiza". Perez Varela presumiu de que o proxecto do Gaiás fora até dúas veces nos programas electorais do PPdeG e as dúas "apoiado maioritariamente nas urnas".

Un sorrinte Xesús Perez Varela relatou na súa comparecencia que o proxecto fora deseñado "milimetricamente" por un equipo "interdisciplinar". "O primeiro que se pensou foi na biblioteca central, aínda que outros prefiran chamala nacional", explicou. "Somos o país máis nidio e diferenciado do Estado, por que non imos ter logo unha gran biblioteca nacional que sexa un símbolo?", indicou. Referiuse a continuación á Hemeroteca Nacional, o Museo da Historia e o edificio das novas tecnoloxías como chanzos seguintes do proxecto. De seguido, sinalou que o teatro da música e a ópera fora proxectado coa convicción de que "podía ser rendíbel" se Galiza era capaz de "liderar o noroeste peninsular: Braga, Porto, Asturias, Valladolid" sumando así "masa crítica suficiente" para traer "as grandes obras de Milán, Barcelona ou París e non as miniaturas que se traen agora".

Dun edificio por cidade ao "contrapunto entre o Santiago clásico e a nova arquitectura"
"Chegouse a pensar en poñer un edificio en cada cidade", recoñeceu o ex conselleiro referíndose ás supostas diferencias de opinión que dentro do propio goberno Fraga había sobre a iniciativa, e destacando que se escollera Santiago como "chegada do Camiño e representante xenuína de Galiza fóra de Galiza".

Falou Pérez Varela ao respecto de dúas grandes finalidades coa idea da Cidade da Cultura, a primeira delas "fixar e consolidar a enorme corrente turística que Galiza tivo nos últimos quince anos". A maiores, o ex responsábel de Cultura na Xunta referiuse á necesidade de "facer unha icona e rachar cos tópicos de minifundismo, atraso secular e falta de multiculturalidade". "Un símbolo que coloca un pobo na esfera internacional", afirmou.

O ex conselleiro evita responder sobre a rede "tecida" á beira do Gaiás
"Podiamos rir co seu relato", reprochoulle o voceiro parlamentario do BNG, Carlos Aymerich, ao ex conselleiro de Cultura, "pero nesta altura non nos fai ningunha gracia o que hai por baixo da súa actuación e imposturas". "Vostede vende un proxecto que non existiu", engadiu Aymerich acusándoo de ser o principal responsábel "da desviación orzamental e concentración de contratos en diversas empresas" desde o día en que fiel ao mandato do ex presidente Manuel Fraga, expresara publicamente "bendito sexa deus, imos tirar para adiante con este tema".

"Vostede é artífice da rede de intereses tecida arredor da Cidade da Cultura", subliñou Aymerich. Ironizou o deputado do Bloque sobre o suposto equipo "interdisciplinar" ao que se referira Pérez Varela, exemplificando co acontecido co grupo asesor para o edificio de novas tecnoloxías, toda unha serie de altos cargos que dun día para o outro "póñense a montar empresas".

"Como e canto incrementou vostede o seu patrimonio durante os anos de xestión na Xunta?", preguntoulle o voceiro do BNG a Pérez Varela, recordando ademais a empresa que en 2005 constituíu xunto con súa muller. Aymerich acusou o ex conselleiro dun compromiso "impostado" coa cultura galega, denunciando que o seu interese principal eran "os cartos e o gran negocio persoal e político no que se convertería o Gaiás". Na opinión do deputado nacionalista, as contratacións e privilexios outorgados pola Consellaría liderada por Pérez Varela fixeron concesión con "todos os sectores", desde "o birrete de Pontevedra", até "a boina de Lugo e Lalín".

Cara á fin da intervención de Aymerich, e cando este o interrogaba sobre o aumento do seu patrimonio de forma paralela aos seus anos no goberno, Pérez Varela adicoulle ao actual deputado o cualificativo de "miserábel". Aymerich retrucoulle ao ex conselleiro definíndoo de "delincuente". O tirapuxa continuou despois, con Xesús Pérez Varela falando da "ruindade dalgúns que mentres sigan así non se consolidarán como demócratas". Ao fío, Carlos Aymerich apúxolle a Pérez Varela que non pretendese "dar leccións de demócrata", recordando os textos dos anos 80 onde o que foi conselleiro con Manuel Fraga "brindaba con Tejero polo éxito do golpe".

"Temos dereito os galegos á verdade?"
Así llo preguntou ao ex conselleiro o voceiro do PSdeG, Xaquín Fernández Leiceaga, facendo un repaso polas irregularidade sobre as que o socialista insistiu en que Xesús Pérez Varela é "persoa decisiva" á hora de dar explicacións. O deputado do PSdeG criticou por exemplo as declaracións en prensa do ex responsábel de Cultura nas que este aseguraba que o chimpo do orzamento até os 284,5 millóns de euros era coñecido por opinión pública e Parlamento desde tempo atrás. Recordoulle Leiceaga que, paradoxalmente, as adxudicacións realizáronse estando o goberno en funcións e co Parlamento disolto.

Lembrou tamén o deputado socialista a ausencia de explicacións e comparecencias do ex conselleiro durante a súa etapa no Goberno, na que evitou dar contas e explicar o detalle do proxecto no Parlamento. Recordou por exemplo que o propio Pérez Varela manifestara no seu momento que "o importante é o proxecto e co tempo xa se verá o seu uso". "E cando as ponencias facían cambios, avaliábase economicamente as implicacións que terían ou había barra libre", ironizou Leiceaga.


4.18/5 (11 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: