Vieiros

Vieiros de meu Perfil


Edición xeral

RSS de Edición xeral
A polémica obra do monte Gaiás

Desestiman a denuncia da CIG contra a Cidade da Cultura

O sindicato decidirá o luns se presenta un recurso contra a decisión do xulgado compostelán.

Redacción - 15:30 03/11/2007

O Xulgado de Instrución número 1 de Santiago decidiu arquivar a causa aberta pola CIG por irregularidades contábeis na Fundación Cidade da Cultura. A titular do xulgado, María Elena Fernández Currás, considera que a vía penal non é a axeitada para levar adiante o proceso, a pesar de que detectou irregularidades no informe do Consello de Contas en que se basea o sindicato.

Mar Peteira, dirixente da CIG que presentara a denuncia o 13 de agosto, anunciou en declaracións á Radio Galega que a executiva da forza sindical decidirá o luns se recorre a decisión xudicial e criticou o feito de que os xulgados non se quixesen "mollar no caso".

A Plataforma Cultura Si Mausoleo Non adiantouse á decisión da CIG, que dispón dun prazo de tres días, e pediulle á Fiscalía do TSXG que recorra o auto xudicial que arquiva a denuncia da xestión das obras da Cidade da Cultura, e opina que hai "razóns penais suficientes" para encausar os responsábeis políticos da xestión durante o goberno do PP.

Pola súa parte, o Partido Popular afirmou este sábado que o Goberno contratou tres directivos da Cidade da Cultura a pesar das irregularidades que advertira a Intervención Xeral da Xunta. Ademais, o PP advertiu que esta denuncia só é "a punta do iceberg" do que consideran "xestión anómala do bipartito".


4,56/5 (9 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: