Vieiros

Vieiros de meu Perfil


Edición xeral

RSS de Edición xeral
Déronse descargas os uns aos outros para probala

Os policías de Vigo queren usar unha pistola que dá descargas eléctricas

Levan varios días teimando por pendurar a famosa pistola Taser do seu cinto. Amnistía Internacional non aproba o emprego da Taser.

Redacción - 12:15 09/11/2007

A pistola Taser é unha arma que dispara dous dardos á fronte, que chegan até sete metros de distancia e que se prenden na roupa ou na pel, (se non leva roupa), da persoa á que se dispara. Daquela, o portador da arma só ten premer outro botón para que a persoa prendida reciba 50 mil voltios directamente no seu corpo, pero a un nivel baixo de amperios, que fai que se paralice todo o corpo durante 5 segundos. Despois, se se quere, pódese repetir a operación, ou isto din os policías municipais de Vigo que levan semanas demandando esta arma porque, segundo contan, moitas veces non son quen de facerlles fronte a delincuentes moi agresivos.

Na quinta feira recibiron clases de manexo da pistola. Só hai unha persoa en Galiza que a sabe usar, José Luis Brage, quen, a petición do sindicato SICO (maioritario na policía viguesa) reuniu a varios axentes da cidade e de vilas da bisbarra (Pontevedra, Moaña, Nigrán e Ponteareas), ademais de dous policías españois, na súa clase.

Houbo catro voluntarios (un cámara de TV e tres axentes), que se ofreceron á electrocución e, ao parecer, todos os presentes coincidiron ao sinalar que a arma é inocua, "só quedas teso" uns segundos, aínda que todos aseguraron non ter sentido dor.

Abel Caballero amosouse "cauto"
Ante as demandas dos seus policía, o alcalde de Vigo amosouse cauto e afirmou que "é un tema que hai que analizar moi en detalle, porque ten moita envergadura" e seguiu, "debemos coñecer a fondo as consecuencias de usar esta arma contra unha persoa".

Amnistía Internacional non aproba o emprego da Taser
Pola contra, AI non considera que a arma sexa inocua e pediulle esta semana ao Concello de Vigo que non autorice o uso da pistola. A organización xa lle tiña pedido á Xunta, o mes pasado, que a policía autonómica e as policías locais do país non as adquiran nin as usen. Nin Xunta nin Concello responderon aínda ás demandas de AI.

Nun recente informe, AI denunciaba o descontrol e a falta de regulación sobre as armas tipo Taser no Estado, nun contexto no que algúns corpos están a anunciar a súa adquisición e policías locais de polo menos tres Comunidades Autonómas dispoñen delas. O Informe Voltios sen control. Uso de pistolas tipo Taser e outras defensas eléctricas de seguridade en España, elaborado pola investigadora viguesa da organización, Yolanda Román, conclúe que estas armas poden provocar facilmente sufrimentos e lesións innecesarias e mesmo a morte. Ademais, poden empregarse para torturar e ser un fácil instrumento de uso abusivo.

"As pistolas paralizantes de electrochoque Taser teñen a capacidade de inflixir dor severa mediante a descarga de 50.000 voltios ao corpo con só premer un botón e sen deixar marcas relevantes, o que as converte nun instrumento moi perigoso susceptible de ser utilizado para torturar e maltratar. Este tipo de armas arrastra un inquietante historial de abusos contra os dereitos humanos alí onde o seu uso se estendeu, como EUA ou Canadá", din dende AI, ao tempo que reclaman a suspensión do seu emprego á espera dunha investigación, a cargo de expertos independentes, sobre os efectos na saúde das persoas que provoca a súa utilización.

Xa se empregan no Estado
Aínda que o uso de armas tipo Taser non se xeneralizou, si que foi en aumento. Segundo conta AI, algunhas Policías locais e autonómicas adquiriron este tipo de armas nos últimos anos, incorporándoas como dotación dos seus axentes ou co fin de probalas.

A policía nacional, a garda civil e a maior parte das policías autonómicas e locais non dispoñen de defensas eléctricas como dotación. Só os GEO (Grupo Especial de Operacións) dispoñen de varios exemplares. En canto ás forzas armadas, o exército de terra adquiriu estas armas para a súa avaliación, do mesmo xeito que a policía catalá, os Mossos d'Esquadra. En Canarias, con todo, as defensas eléctricas forman parte do material básico das policías locais. A normativa da Comunidade Valenciana considéraas dotación opcional. E polo menos outras catro Comunidades Autónomas teñen unha normativa ambigua que abre as portas á utilización destas armas como parte da dotación das policías locais.

Aquí vos deixamos un vídeo dos efectos da pistola, grabado nos EUA, onde Taser xa é unha palabra de uso común e mesmo un verbo, xa que é normal "tasear" a alguén:


5/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: