Vieiros

Vieiros de meu Perfil


Edición xeral

RSS de Edición xeral
O comité da ONU reúnese o domingo

O cambio climático é o resultado dunha "ditadura baseada na cobiza"

Así o reflexiona o escritor Manuel Rivas no proxecto Photoclima, de Greenpeace. O colectivo usou o exemplo dos fondos mariños galegos para advertir da gravidade do problema.

Redacción - 13:20 09/11/2007

"O chamado cambio climático, que soa a técnico eufemismo, non é o produto dunha fatalidade, senón da consecuencia dunha ditadura, baseada na codicia, a explotación e o terror sobre a natureza", escribe Manuel Rivas para este volume, "Non haberá excepcións, non haberá espazos inmunes, non haberá lugar para a humanidade, se non freamos esa impaciente e corrosiva ditadura global".

O próximo domingo 12 de novembro, o Panel Intergubernamental sobre Cambio Climático das Nacións Unidas, merecedor do premio Nobel da Paz este ano, presentará en Valencia o seu cuarto informe de avaliación. Aproveitando a actualidade, Greenpeace presentou o libro Photoclima: Imaxes dun futuro afectado polo cambio climático. O volume inclúe varias imaxes tratadas informaticamente, que tratan de explicar as posíbeis consecuencias que en diversos lugares do Estado tería o cambio climático a medio prazo "se non se toman medidas de forma urxente". Entre os exemplos, aparecen os fondos das Cíes, dun lado na vizosa biodiversidade que acollen na actualidade e doutro o prognóstico do ermo en que poderían converterse.

"As decisións políticas deben asegurar que imaxes como as que agoira este libro non sexan imaxes de futuro: o futuro pode e debe ser outro", explica Raquel Montón, responsábel da campaña de cambio climático de Greenpeace.

No volume, que pode descargarse na web do colectivo, colabora tamén o escritor José Saramago. "Non seremos nada sen os nosos ríos, sen a auga que levan e sen a memoria que somos. Preservémonos mutuamente, xa que uns a outros démonos nome e recoñecémonos", relata o Nobel de Literatura.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Imaxe do fondo das Cíes na actualidade
Imaxe do fondo das Cíes na actualidade
Un agoiro posíbel
Un agoiro posíbel