Vieiros

Hugo Chávez xa fixera un primeiro comentario sobre o polémico cruce de declaracións co monarca e máis co presidente español, apuntando que Juan Carlos de Borbón "é tan xefe de Estado coma min, coa diferencia de que eu son electo nas urnas até tres veces e con amplas maiorías".

"A pregunta que me fago é, e será bo que responda o rei de España, señor Rei, diga: sabía vostede do golpe de Estado contra Venezuela, contra o goberno democrático, lexítimo de Venezuela en 2002? É moi difícil pensar que o embaixador español vai estar en palacio apoiando os golpistas sen autorización da súa Maxestade". A afirmación era realizada por Chávez durante unha entrevista televisiva en Chile, despois do peche do Cumio Iberoamericano, onde brincaba ás primeiras planas o cruce de palabras do presidente venezolano co presidente español, José Luís Rodríguez Zapatero, e co propio Juan Carlos de Borbón.