Vieiros

Vieiros de meu Perfil


Edición xeral

RSS de Edición xeral
Posicións marcadas nun debate que vai lento

PPdeG e PSdeG a prol do voto emigrante nas autonómicas, o BNG pide suprimilo

Logo da indefinición e o temor que no trato do tema mantiñan os partidos, acláranse posicións. Populares e socialistas só estarían dispostos a restrinxilo nas municipais.

Redacción - 09:00 15/11/2007

Dous puntos conseguirían até o de agora o consenso entre todas as forzas políticas neste asunto. En primeiro lugar a necesidade de que o sufraxio se realice en urna e que ao tempo sexa froito dunha depuración do censo de residentes ausentes que elimine as irregularidades detectadas. En segundo lugar, que os emigrantes computen á hora do reparto de escanos entre as provincias.

Pero non hai acordo nun aspecto clave: en que citas electorais poderán ou non votar os emigrantes? O BNG foi o primeiro en presentar unha proposta ao respecto, e o seu voceiro parlamentario, carlos Aymerich, subliñábaa este mesmo mércores: voto para os emigrantes de primeira xeración e só nos comicios xerais e europeos, de xeito que non poidan facelo nin nas eleccións autonómicas nin nas municipais.

PPdeG e PSdeG estarían dispostos a estudar a supresión do voto emigrante neste último caso, o dos comicios locais. O propio presidente do PPdeG, Alberte Núñez Feijoo, pronunciábase a prol desa posibilidade esta mesma semana. Non así no caso das eleccións galegas, onde por exemplo o voceiro parlamentario do PSdeG, Ismael Rego, explicou que o seu partido "non é proclive a limitar dereitos". Así e todo, tanto populares como socialistas evitan polo momento afondar nesta cuestión. O deputado popular Aurelio Miras Portugal, ex conselleiro de Emigración, laiábase esta cuarta feira do "caldo de cultivo" creado para que a cidadanía sexa proclive a "limitar dereitos dos residentes no exterior".

Desde o BNG, Aymerich pedíalle aos seus interlocutores "un esforzo de honradez" para tratar o asunto e evitar que se produza o "escándalo" das últimas eleccións. En 15 días as posicións de todas as formacións políticas deberían estar claras, con todas as propostas sobre a mesa.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: