Vieiros

A Consellaría de Vivenda e Solo recibiu un total de 410 solicitudes para as primeiras 36 vivendas protexidas en aluguer, rehabilitadas no barrio da Tinería no Centro Histórico de Lugo.

No entanto, a cifra que non é definitiva xa que aínda pode chegar algunha petición feita dentro de prazo e presentada nos portelos únicos da Administración.

A conselleira, Teresa Táboas, que este xoves visitou en Lugo a exposición Rehabilitando a Tinería, explicou que o sorteo entre os alugueiros -mozos menores de 35 anos, con ou sen fillos, cuns ingresos ponderados que non superen os 1.700 euros mensuais- organizarase este mes ante notario.

Os contratos estarán asinados no primeiro trimestre de 2008, data en que os primeiros inquilinos ocuparán as 36 vivendas rehabilitadas.

Estas contan con entre un e catro dormitorios, e o prezo do aluguer que oscilará entre os 70 e os 250 euros mensuais, en función do número de dormitorios e do nivel de renda dos adxudicatarios.