Vieiros

Na mesma semana en que se fan 32 anos da morte de Franco, o conselleiro de Interior e de Relacións Institucionais e Participación da Generalitat, Joan Saura, vai expoñer publicamente o anteproxecto dunha nova lei (A Lei das Foxas Comúns), que vai axudar a recuperar os restos dos cataláns asasinados entre 1936 e 1939, durante a Guerra Civil.

Saura anticipou esta segunda feira que, segundo esta lei, as familias dos desaparecidos e as entidades de recuperación da memoria histórica poderían pedir a escavación das foxas comúns, e que a Generalitat de Catalunya correría con todos os gastos. Sería a primeira vez que un goberno se fixese cargo do financiamento dunhas exhumacións, que na actualidade realiza (entre outras asociacións), por toda a península, a Asociación para a Recuperación da Memoria Histórica (ARMH), unha entidade sen ánimo de lucro que se autofinancia, coa axuda dos seus socios, familiares dos represaliados e, ás veces, axudas de concellos e gobernos autonómicos.

A nova lei catalá pola recuperación da memoria histórica

O propósito desta nova lei é, segundo a Generalitat, "restablecer a dignidade dos desaparecidos na guerra de 1936-39 e na ditadura franquista; facer posíbel o dereito dos familiares de obter información das circunstancias nas que finaron os seus parentes e, se é preciso, recuperar os restos; sinalar a foxa e recuperala para a memoria histórica". A lei permite achegas de asociacións, cidadáns e administracións até o vindeiro 10 de decembro.

A partir de agora, quen desexe cavar unha foxa, debe aportar probas documentais ou ter indicios fundamentados, que avaliará unha comisión asesora, formada por profesionais de prestixio e por representantes de entidades da memoria histórica e do goberno catalán. Despois, o informe que saia desta comisión irá á Dirección Xeral da Memoria Democrática, que o analizará e dirá como é preciso actuar.

Censo de desaparecidos

Este anteproxecto tamén fala da creación dun censo de persoas desaparecidas a mans do fascismo e dun mapa de foxas comúns de Cataluña (segundo a Generalitat, hai á volta de 150).