A igrexa de Santiago de Rubiás acolle este sábado a presentación do documental O País dos Mixtos, dirixido por Xosé Luís Ledo Andión e que recolle a historia do Couto Mixto
O documental O País dos Mixtos recolle o pasado, presente e futuro do Couto Mixto, as aldeas de Santiago, Rubiás e Meaus nos concellos de Calvos de Randín e Baltar (Ourense), unidas durante séculos polos seus privilexios e consciencia de pobo. A presentación do filme terá lugar ás cinco da tarde do sábado 24 na igrexa de Santiago de Rubiás (Calvos de Randín), antiga capital política do Couto, e na que se garda a arca coas tres chaves onde historicamente se custodian os documentos que reflexan a existencia desta República durante máis de cinco séculos.
O País dos Mixtos, dirixido por Xosé Luís Ledo Andión e guión de Olaia Ledo Díaz, está coproducido por Televisión de Galicia e Nós, P.C.G. e conta coa colaboración de AGADER.