Vieiros

Vieiros de meu Perfil


Edición xeral

RSS de Edición xeral
REACCIÓNS

Unanimidade na repulsa ao atentado de ETA

PPdeG, PSdeG e BNG amosan a súa condena pola morte dun garda civil en Francia e trasládanlle a súa solidariedade á familia.

Redacción - 10:30 02/12/2007

As tres forzas políticas do país condenaron o atentado de ETA do sábado contra dous gardas civís. Un deles, Raúl Centeno, morreu, e o outro, Fernando Trapero, atópase en coma profundo. Os líderes do PPdeG, do PSdeG e do BNG amosaron a súa repulsa polos feitos e solidarizáronse coas familias dos axentes, de vinte e poucos anos de idade.

Alberto Núñez Feijoo expresou a súa “condena máis rotunda” ao atentado acontecido o sábado á mañá no suroeste de Francia e amosou o seu “respecto e cariño” ás familias do axente asasinado e mais do ferido grave. O líder do PPdeG afirmou que “entre todos derrotaremos a ETA”, porque “coa vida non se negocia”.

Por parte do PSdeG, o presidente da Xunta, Emilio Pérez Touriño, expresou “a repulsa máis enérxica e a condena unánime do pobo galego ao execrábel atentado”. Touriño lamentou no seu nome e no de todo o Goberno o asasinato e trasladou a “solidariedade plena” ás familias das vítimas. Pérez Touriño expresou a necesidade de que todas as forzas democráticas sigan a traballar pola paz e pola defensa dos dereitos e liberdades e amosou o seu “total respaldo” ao labor das forzas de seguridade.

O Bloque Nacionalista Galego amosou a súa “máis enérxica repulsa” á “nova manifestación da barbarie terrorista e á insistencia da bada ETA no uso irracional da violencia”. Nun comunicado, o BNG transmitiu a súa solidariedade cos familiares e amigos do axente morto e chamou á unidade das forzas parlamentarias “para non deixar ningunha fenda no bloque democrático no combate contra ETA”. Para o BNG, “ETA non ten outro futuro que o da súa inevitábel disolución”, ao ser “a súa existencia contraria a todo proxecto democrático e ao necesario respecto aos dereitos humanos”.

Entre as accións simbólicas de repulsa, a Fegamp fixo un chamamento aos cidadáns de todos os concellos do país a se concentraren o luns ao mediodía diante dos seus respectivos consistorios.

Segundo informou o Ministerio do Interior, os dous gardas civís, que formaban parte dun dispositivo de vixilancia a ETA, foron atacados por tres militantes da banda vasca no exterior da cafetaría Les Ecureuilles, na vila de Capbretón, no departamento francés das Landas. Os feitos producíronse despois de que os tres membros de ETA identificasen os axentes, cos que coincidiron no local hostaleiro.


2.2/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: