Vieiros

O escritor Xurxo Borrazás protagoniza a capa do cuarto número de ProTexta, (.pdf / 5,3 Mb) o suplemento de libros da revista TEMPOS Novos. Coincidindo coa publicación do seu polémico ensaio Arte e parte (Galaxia) e coa saída da versión castelá de Ser ou non, publicada por Caballo de Troya co título La aldea muerta, o de Carballo debulla a súa visión crítica da cultura galega e traza as estremas da súa propia posición no sistema.

Ademais desta entrevista co autor de Cabeza de chorlito, a revista que coordina Iago Martínez inclúe entre outros unha conversa entre os historiadores Justo Beramendi e Ramón Villares. O diálogo aproveita a publicación de De provincia a nación. Historia do galeguismo político (Xerais), “a obra magna de Beramendi” ao ver de Manuel M. Barreiro, para revisar a deriva do nacionalismo galego contemporáneo.